ސްޕެއިންގެ ޓޮލެޑޯ އަވަށުގައި ބާރު ދުވެލީގެ ދެ ރޭލު ޖެހި ހިނގި ނުރައްކާތެރި އެކްސިޑެންޓެއްގައި މަދުވެގެން 46 މީހުން މަރުވެ، އެތައް ބަޔަކު ޒަޚަމްވެއްޖެ ކަމަށް އެ ޤައުމުގެ ކަމާބެހޭ އިދާރާތަކުން ހާމަކޮށްފިއެވެ.
މި ހިތާމަވެރި ހާދިސާ ހިނގާފައިވަނީ ލޮސް ޔެބެނެސް އަދި އުރްދާ ރަށާ ދެމެދު އޮންނަ ރޭލު މަގުގައެވެ. ކަމާބެހޭ ފަރާތްތަކުން މަޢުލޫމާތު ދޭ ގޮތުގައި، މި އެކްސިޑެންޓް ހިނގި ވަގުތު ދެ ރޭލުގައި ޖުމްލަ 500 އަށް ވުރެ ގިނަ ފަސިންޖަރުން ދަތުރުކުރަމުން ދިޔައެވެ. އޭގެ ތެރޭގައި ހިމެނެނީ ”އިރިއޯ“ ރޭލުގައި ތިބި 147 ފަސިންޖަރުންނާއި، ”އޭވީއީ“ ރޭލުގައި ދަތުރުކުރި 397 ފަސިންޖަރުންނެވެ.
މި ނުރައްކާތެރި އެކްސިޑެންޓާ ގުޅިގެން ރޭލުތަކުގެ ބައެއް ބައިތައް މަގުން ކަހައިގެން ގޮސް ފުރޮޅާލާފައިވާއިރު، މެޑްރިޑާއި އަންދަލޫސިއާ ގުޅުވައިދޭ މައި ރޭލު ދަތުރުފަތުރުގެ ޚިދުމަތް މިހާރު ވަނީ ވަގުތީ ގޮތުން މުޅިން މެދުކަނޑާލާފައެވެ.
ހާދިސާ ހިނގި ސަރަޙައްދުގައި ހާލުގައި ޖެހިފައިވާ މީހުން ސަލާމަތްކުރުމަށާއި އަވަސް ފަރުވާ ދިނުމަށްޓަކައި، މޯބައިލް އިންޓެންސިވް ކެއާ ޔުނިޓުތަކާއި ލޮޖިސްޓިކްސް އެހީތެރިކަން ފޯރުކޮށްދޭ ޚާއްޞަ އުޅަނދުތައް ވަގުތުން ވަނީ އެ ސަރަޙައްދަށް ފޮނުވާފައެވެ.
މި ހިތާމަވެރި ހާދިސާއާ ގުޅިގެން ސްޕެއިންގެ ބޮޑުވަޒީރު ޕެޑްރޯ ސަންޗެޒް ވަނީ ފުން ހިތާމަ ފާޅުކުރައްވާފައެވެ. އަދި އަނިޔާވި ފަރާތްތަކަށާއި މި ހާދިސާގައި ވަކިވެދިޔަ މީހުންގެ ޢާއިލާތަކަށް ސަރުކާރުގެ ފުރިހަމަ އެއްބާރުލުމާއި އެހީތެރިކަން ލިބޭނެ ކަމުގެ ޔަޤީންކަން ބޮޑުވަޒީރު ވަނީ ދެއްވާފައެވެ.
މިއީ މިއަހަރުގެ ތެރޭގައި ސްޕެއިންގައި މިފަދަ ބާރު ދުވެލީގެ ރޭލެއް އެކްސިޑެންޓްވި ދެވަނަ ފަހަރެވެ. މި އަހަރުގެ ޖެނުއަރީ މަހުގެ ތެރޭގައި ހިނގި މިފަދަ އެހެން ހާދިސާއެއްގައި ވެސް 45 މީހުންގެ ފުރާނަ ވަނީ ގެއްލިފައެވެ. މި ހާދިސާ ތަޙުޤީޤު ކުރުމުގެ މަސައްކަތް ސްޕެއިންގެ ކަމާބެހޭ އިދާރާތަކުން މިހާރު ވަނީ ފަށާފައެވެ.