ދިވެހިރާއްޖޭގެ އެންމެ ބޮޑު ބޭންކު ކަމަށްވާ ބޭންކް އޮފް މޯލްޑިވްސް (ބީއެމްއެލް) އިން މި އަހަރުގެ އިންޓަރންޝިޕް ޕްރޮގްރާމަށް އެދި ހުށަހެޅުމުގެ ފުރުސަތު ހުޅުވާލައިފި އެވެ. މިއީ ރާއްޖޭގައި މަތީ ތައުލީމު ފޯރުކޮށްދޭ މަރުކަޒުތަކުގެ ތައުލީމު ހާސިލްކުރަމުންދާ ދަރިވަރުންނާއި ދަސްވެނިންނަށް އަމާޒުކޮށް، 12 މަސްދުވަހުގެ މުއްދަތަކަށް ބޭންކުން ހިންގާ މުހިންމު ޕްރޮގްރާމެކެވެ.
ބީއެމްއެލް އިން ބުނީ މި ޕްރޮގްރާމްގެ ދަށުން މިހާތަނަށް އެކި ދާއިރާގެ ގްރެޖުއޭޓުންނަށް ވަޒީފާގެ މާހައުލަށް އަހުލުވެރިވުމުގެ ފުރުސަތު ފަހިކޮށްދީފައިވާ ކަމަށެވެ. އަދި މި އަހަރު، އައިޓީ ދާއިރާއިން ތައުލީމު ހާސިލުކުރާ ދަރިވަރުންނާއި ގްރެޖުއޭޓުންނަށް ހާއްސަކޮށްފައިވާ ”ޓެކް ސްޓާޓް“ އިންޓަރންޝިޕް އަށްވެސް ހުޅުވާލާފައިވާ ކަމަށެވެ.
މި ޕްރޮގްރާމްގެ ދަށުން ދެ ބަޔަކަށް ފުރުސަތު ހުޅުވާލާފައިވެއެވެ.
ގްރެޖުއޭޓް އިންޓަރންޝިޕް:
- މި ފުރުސަތު 15 ބައިވެރިންނަށް ހުޅުވާލާފައިވާއިރު، ބޭންކުގެ އެކި ޑިވިޜަންތަކުގައި މަސައްކަތްކުރުމުގެ ފުރުސަތު ލިބޭނެ އެވެ.
ޓެކް ސްޓާޓް އިންޓަރންޝިޕް: - މި ޕްރޮގްރާމް ހާއްސަކޮށްފައިވަނީ އައިޓީ ދާއިރާގެ ދަރިވަރުންނާއި ދަސްވެނިންނަށެވެ. 10 ބައިވެރިންނަށް ފުރުސަތު ހުޅުވާލާފައިވާއިރު، ބޭންކުގެ ޓެކްނޮލޮޖީ ޑިވިޜަންގައި މަސައްކަތްކުރުމުގެ ފުރުސަތު ލިބޭނެ އެވެ.
މި ޕްރޮގްރާމް މެދުވެރިކޮށް ދަރިވަރުންނާއި ދަސްވެނިންނަށް އިންޓާންޝިޕް މުއްދަތުގައި ދެވޭ ތަޖުރިބާ އާއި ހުނަރު އިތުރުކުރުމަށް ބޭންކުގެ އެކިއެކި ބިޒްނަސް ޔުނިޓްތަކާއި ޑިޕާޓްމަންޓްތަކާއި ބްރާންޗްތަކުގައި މަސައްކަތް ކުރުމުގެ ފުރުސަތު ލިބިގެންދާނެ އެވެ. މިއީ ވަޒީފާގެ ބާޒާރަށް ނުކުންނަ ޒުވާނުންނަށް އަމަލީ ތަޖުރިބާ ލިބި، ކުރިމަގަށް ތައްޔާރުވުމަށް ލިބޭ ރަނގަޅު ފުރުސަތެކެވެ.
މާލީ އެހީއެއްގެ ގޮތުން، މި އަހަރުގެ ގްރެޖުއޭޓް އިންޓަރންސް އަށް ކޮންމެ މަހަކު ލިބޭ އެލަވަންސް 9,000 ރުފިޔާއަށް ބޮޑުކޮށްފައިވާއިރު، ޓެކް ސްޓާޓް އިންޓަރނސްއަށް މަހަކު 11,000 ރުފިޔާގެ އެލަވަންސެއް ލިބޭނެ އެވެ. މިއީ އިންޓަރންސްގެ މާލީ ބުރަ ކުޑަކޮށް، މަސައްކަތަށް އިތުރު ހިތްވަރެއް ލިބިގެންދާނެ ކަމެއް ކަމަށް ބެލެވެއެވެ.
2018 ވަނަ އަހަރުން ފެށިގެން މިހާތަނަށް ބޭންކުން 77 އިންޓަރންސް އަށް ތަޖުރިބާގެ ފުރުސަތު ފަހިކޮށްދީފައި ވެއެވެ. މީގެ ތެރެއިން ބައެއް އިންޓަރންސް އަށް ބޭންކުގެ ދާއިމީ ވަޒީފާގެ ފުރުސަތުވެސް ލިބިފައި ވެއެވެ. މިއީ މި ޕްރޮގްރާމްގެ ކާމިޔާބީއާއި، ޒުވާނުންނަށް ކުރިމަގަށް މަގުފަހިކޮށްދިނުމުގައި ބީއެމްއެލް އަދާކުރާ ދައުރުގެ ހެއްކެކެވެ.